3. maj 2002 FM2002/14
Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaannut siunnersuut
pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
siunnersuutip aappassaaneerneqarnissaanut saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat siunnersuummik suliarinninnermini ukuninnga inuttaqarpoq:
Inatsisartuni ilaasortaq Simon Olsen, Siumut, siulittaasoq
Inatsisartuni ilaasortaq Godmand Rasmussen, Atassut, siulittaasup tullia
Inatsisartuni ilaasortaq Mikael Petersen, Siumut
Inatsisartuni ilaasortaq Lars Sørensen, Inuit Ataqatigiit
Inatsisartuni ilaasortaq Mads Peter Grønvold, Kattusseqatigiit
Inatsisartut Akileraartarnermut Akitsuusiisarnermullu Ataatsimiititaliaat UPA2002-imi siullermeerinerup kingorna Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaannut siunnersuut nassuiaatitai ilanngullugit misissuataarpaa:
Siunnersuutip paasinarsisinneqarnissaanut paasissutissat amerlanerusut
"Umiarsut takornarianik angallassissutit atorlugit Kalaallit Nunaanni takornarianik angallassineq pillugu nassuiaat" UKA2001/20-ip tassalu Takornariaqarnermik inuussutissarsiuteqarneq aamma nunami inuussutissarsiutit siuarsarneqarnissaat pillugit Inatsisartut inatsisissaattut siunnersuutip suliarineqarnerani Inatsisartut aalajangiineri tunngavigalugit Naalakkersuisunit suliarineqartoq ataatsimiititaliamut nassiunneqarpoq.
Tusarniaanermit akissutisiatSiunnersuutip matuma ataatsimiititaliamit suliarineqarnerani atugassatut tusarniaanermit akissutit nuutinneri ataatsimiititaliap piniarpai.
Siunnersuutip imarisaaSiunnersuummi allannguutit pingaarnerit ataatsimiititaliap misissuataarpai tassungalu atatillugu imaattunik oqaaseqaateqassalluni.
SUmiarsuit takornarianik angallassissutit umiarsualivimmiinnermut akileraarutinik akiliisarnerisa allanngortinneqarneranik siunnersuut imaqarpoq.
Ullumikkut akileraarut tonnage-mut akileraarutitut aamma umiarsuarmut akileraarutitut aaqqitaavoq, umiarsuup umiarsualivissinnerani umiarsualiviulluunniit avataani kisarsimaffimmiinnerani akilersinneqartartoq. Ullup unnuallu aallartinneqarnerini tamani bruttotons-imut ataatsimut 0,70 kroninik umiarsuaq umiarsulivissinnermut akileraarummit akiliisarpoq. Umiarsuaq umiarsualiviup avataani kisarsimaffimmiippat akileraarut affaannanngortinneqartarpoq. Umiarsualiviup avataa 3 sømil angullugit avasitsigisoq kisarsiffittut isigineqartarpoq.
Siunnersuutip kingunerisaanik, umiarsuup umiarsualivimmut, umiarsualiviup avataani kisarsimaffissaminut imaluunniit sinerissami ilaasuminik nunnigussiffissaminut tikinnerani ilaasunut ataasiakkaanut akileraarummik inummut akileraarummik, Pax-tax-imik taagorneqartumik akiliuteqartarnissaq eqqunneqassaaq. Ilaasut nutaat umiarsuup Kalaallit Nunaata imartaani angalanerani ikisut Pax-tax-imik aamma akiliisinneqartassapput.
Umiarsuup sinerissami angalanermini umiarsualiviit amerlanerit tulaffigippagit sinerissamiluunniit angalanermini ilaasuminik niusippat akileraaruseeqqittoqartassanngilaq.
Mianersortumik periuseqarnissaq aallaavigalugu, Greenland Tourism, Royal Arctic Line aamma Arctic Umiaq Line isumasioqatigalugit Pax-tax-ip 300,- kroninik annertussuseqarnissaa aalajangiunneqarpoq, taakkulu assigiimmik naliliinerat malillugu akileraarummik taama annertussusiliinerup, nunani allamiut umiarsuarsuit takornarianik angallassissutit Kalaallit Nunaat avaqqullugu angalasalernissaat imaluunniit Arctic Umiaq Line-p Kalaallit Nunaanni umiarsuaatiminik takornarissanik angallassinerminik taamaatitsinissaa kingunerissanngilaa.
Pax-tax-ip eqqunneqarneratigut umiarsuarnut takornarianik angallassissutinut ilaallutik takornariat qanoq amerlatigisarnerat ilisimaneqarnerulissaaq.
Umiarsuit takornarianik angallassissutit siunnersuummi siunertarineqartutut Kalaallit Nunaata aningaasaqarneranut ilapittuutaanissaat, ataatsimiititaliamit naammagisimaarlugu maluginiarneqarpoq. 1. januar 2003 aallarnerfigalugu siunnersuutip kingunerissavaa Landskarsip ukiumoortumik 1,2 millioner kroninik iluanaaruteqarnerusalernera. Tamatumap saniatigut Arctic Umiaq Line-mik sullissinissamik isumaqatigiissut 1,8 millioner kroninik sipaaruteqarfiussaaq, umiarsuaatileqatigiimmi Namminersornerullutik Oqartussanit sullissinissamik isumaqatigiissuteqartut umiarsuaatiminnut ilaasartaatinut umiarsualivimmiinnermut akileraarutinik akiliisartussaanngimmata. Tunngavissaatinneqarmammi Namminersornerullutik Oqartussat sullissinissamik isumaqatigiissummut akiliutigisartagaat umiarsuaatileqatigiiffiup umiarsualivimmiinnermut akileraarummit akiliutissaraluisa amerlaqataannik ikilineqarnissaat.
Siunnersuutikkuttaaq naatsorsuutigineqarpoq umiarsualivissinnerit amerlanerulernerisigut nunami kaaviiaartitsineq annertusissasoq.
Kalaallit Nunaata imartaani umiarsuit atorlugit takornarianik angallassinissamik neqerooruteqartartut akornanni unammillernikkut naligiinnerusumik atugassaqartitaalernissaat siunnersuutikkut aamma iluaqusiivigineqassaaq, tassami umiarsuit takornarianik angallassissutit tamarmik nunamit suminngaanneerneri apeqqutaatinnagit akileraarusiiffigineqartassammata, taakkununngalu ilanngullugit umiarsuit ilaasartaatit takornarianik sinerissami angallassinissaq siunertaralugu piffissami aalajangersimasumi angallavimmik aalajangersimasumik angallas-siunnaarallartartut.
Akileraarutip allanngortinneqarnerata kiisalu Pax-tax-ip annertussusilerneqarnerata kingunerisai ukiut marluk qaangiuppata naliliivigeqqullugit Naalakkersuisut ataatsimiititaliamit qinnuigineqassapput.
Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaannut siunnersuut taamatut iluseqarluni akuersissutigineqassasoq ataatsimiititaliap isumaqatigiittup taama oqaaseqarluni inassutigaa.
Simon Olsen, siulittaasoq Godmand Rasmussen Mikael Petersen Lars Sørensen Mads Peter Grønvold